Battalion vs. Defenders sa WNBL Championship

ni Anthony E. Servinio - @Sports | June 14, 2022

Nakakasa na ang tapatan ng Army Lady Battalion at PSI Air Force Lady Air Defenders para sa kampeonato ng 2022 Women’s National Basketball League (WNBL) matapos durugin ng Army ang numero unong Taguig Lady Generals, 51-44, sa Game Three ng kanilang serye sa semifinals noong Linggo sa Bren Z. Guiao Convention Center ng San Fernando, Pampanga. Ang seryeng best-of-three ng Army at Air Force ay gaganapin sa susunod na linggo.

Mula sa huling tabla na 27-27 sa third quarter, bumuhos ng 14 sunod-sunod na puntos ang Army sa likod nina Janine Pontejos, Marites Gadian at Vangie Soriano upang lumamang, 41-27. Pansamantalang pinigil ng free throw ni April Siat bago magsara ang quarter ang pagragasa ng Army.

Nagawang lumapit ang Taguig ng lima, 44-49, matapos ang dalawang magkasunod na buslo ni Sthefanie Ventura at 37 segundo na lang sa orasan. Kinapos sa oras ang Lady Generals at sinigurado ni Chak Cabinbin ang panalo ng Army sa kanyang dalawang free throw na may 12 segundong nalalabi.

Nanguna muli sa Lady Battalion si Pontejos na may 16 puntos. Sinundan siya ni Cabinbin na may 8 puntos at 10 rebound habang 8 puntos din si Gadian at 7 puntos si Soriano.

Nagsimula rin ang hiwalay na seryeng best-of-three sa semifinals ng 2022 National Basketball League (NBL) President’s Cup hatid ng Converge. Nakauna agad ang host Pampanga Delta sa bisitang Quezon Barons, 107-80, habang wagi ang Taguig Generals sa DF Bulacan Republicans, 83-78.