ni Gerard Peter - @Sports | July 22, 2021
Nagbabaga ang mga kamay ng mga manlalaro ng Northport Batang Pier ng sunugin ang walang kargang Phoenix Super LPG, upang makuha rin ang unang panalo sa kasisimula pa lang na 46th season ng PBA Philippine Cup sa Ynares Arena sa Pasig City.
Tatlong manlalaro ang kumana ng 20 puntos sa laro mula kina Robert Bolick at veteran Kevin Ferrer na kumuha rin ng 9 rebs mula sa bench.
Bukod kina Bolick at Troy Rike na kabilang sa starters, rumehistro rin ng double digit scoring ang tatlo pang iba na sina Paolo Taha sa 12 pts, 2nd draft pick Jamie Malonzo na may 15 pts, at Sidney Onwubere sa 15 pts.
Bumitaw ng kabuuang 54% sa field goal ang Batang Pier na nakabawi sa unang talo nito kontra sa Meralco Bolts noong opening day.
Nanguna sa Super LPG si Vic Manuel na may 26 puntos, habang sinegundahan ni Matthew Wright sa 15 pts. Nag-ambag ng 12pts si Jason Perkins.
Hindi pa nakakabalik sa paglalaro ang inaabangan ng lahat na si Greg Slaughter para sa Batang Pier, gayundin si captain Sean Anthony, samantalang na-miss din ng Super LPG ang laro ni Fil-Italian Chris Banchero na nakakaranas ng calf injury. Si Banchero ang naging kapalit ni Calvin Abueva sa trade na naganap noong Pebrero.
Samantala, iniukit ng ALZA-Alayon Zamboanga del Sur ang g unang panalo sa Chooks-to-Go Pilipinas VisMin Super Cup Mindanao division matapos takasan ang host team na Pagadian City Explorers, 78-73, Miyerkules ng hapon sa Plaza Luz Gym, Pagadian City, Zamboanga del Sur.
Isang mainit na tres ang binitawan ng 42-anyos na pro-cager na si Dennis Daa sa nalalabing 16 segundo ng laro upang siguraduhin ng ALZA-Alayon ang kanilang unang panalo sa tatlong laro.
Tumikada ng kabuuang 17 puntos kasama ang 3-of-6 sa three-point arc kasama ang 7 rebounds, 2 assists at 3 blocks. Sumegunda naman sa kanya si Eliud Poligrates sa 15pts, 7 rebs at 1 assist.