Bataan, ligtas na sa bird flu – DA

ni Lolet Abania | November 15, 2022

Ipinahayag ng Department of Agriculture (DA) na ang lalawigan ng Bataan ay ligtas na mula sa avian influenza o bird flu free na.

Batay sa Memorandum Circular No. 39 ng DA, series of 2022, may petsang Nobyembre 14, 2022, idineklara ni DA Senior Undersecretary Domingo Panganiban na, “avian influenza freedom of the province of Bataan.”

Matatandaan noong Marso ng kasalukuyang taon, apektado ang Bataan ng highly pathogenic avian influenza (HPAI) subtype H5N1 matapos na isang bakuran ng tinatawag na mallard duck farm o mga alagang pato ay nagpositibo sa test sa nasabing virus.

Ayon kay Panganiban, nang ma-detect ang naturang sakit, ang lokal na gobyerno ng Bataan sa pakikipag-ugnayan sa DA Regional Field Office III at ng Bureau of Animal Industry (BAI), ay nagsagawa ng disease investigation, agarang depopulation, paglilinis at disinfection, mga restriksyon at surveillance sa apektadong mga lugar.

“Results of subsequent disease monitoring in the one-kilometer and seven-kilometer surveillance zones surrounding the affected farms yielded negative results for influenza type A virus. The last HPAI H5N1 laboratory detection was on March 22, 2022,” pahayag ng DA official.

Sinabi naman ni Panganiban na ang Bataan ay idineklara nang bird flu free matapos ang joint efforts ng local government units (LGUs), DA Regional Field Office, at BAI na aniya, “applying effective disease control measures such as stamping out, cleaning and disinfection, and other quarantine activities.”

Kaugnay nito, batay sa datos ng BAI, lumabas na wala nang kaso ng bird flu na nai-report mula Oktubre 14 hanggang 20, 2022.

May kabuuang siyam na rehiyon, 18 probinsiya, 68 munisipalidad, at 136 barangay ang naapektuhan ng avian influenza simula pa noong Enero ngayong taon.

Bukod sa Bataan, una nang idineklara ang lalawigan ng Camarines Sur at Davao del Sur na nakarekober na mula sa bird flu.