Bank accounts, resibo sa impeachment... Sara, 'di puwedeng piliting umamin — Chiz

ni Mylene Alfonso @News | September 30, 2026

Photo: Sara Duterte at Chiz Escudero - Senate PH / FB

Hindi maaaring pilitin si Vice President Sara Duterte na umamin na siya ang may-ari ng mga bank account na records na isinumite sa impeachment trial, ayon sa naging ruling ng Senate impeachment court kahapon.

Ayon kay Presiding Officer Francis “Chiz” Escudero, hindi kailangang sagutin ni Duterte ang request for admission ng House prosecution panel at ang hindi niya pagsagot ay hindi ituturing na pag-amin.

“The impeachment court, therefore, rules that respondent cannot be required to serve a written response to the request for admission,” ani Escudero.

Saklaw ng dating request ng prosecution ang 104 matters na may kaugnayan sa personal na impormasyon ni Duterte, kanyang mga dating posisyon sa gobyerno, business interests ng kanyang asawa, at iba’t ibang bank records.

Una nang tumutol ang defense team ni Duterte sa request at hiniling na alisin ito sa records ng impeachment court.

Matapos bawiin ng prosecution ang request, hiniling naman nito sa defense na magkaroon ng stipulation tungkol sa authenticity ng mga bank records, kabilang ang pagkakaroon ng mga account at ang pagiging tunay ng mga dokumentong ipinasa ng mga bangko.

Pero ayon kay Escudero, hindi maaaring manaig ang Rule 26 ng Rules of Civil Procedure laban sa karapatan laban sa self-incrimination na nakapaloob sa Konstitusyon.

“The respondent’s objection to the application of Rule 26 is sustained. Respondent need not answer the request for admission and her failure to answer shall not be deemed an admission,” diin ni Escudero.

Gayunman, hindi pinagbigyan ng impeachment court ang hiling ng defense na burahin ang request sa records.

“However, her prayer to expunge the request is denied. The request, the objection, and this ruling shall remain in the record as part of the proceedings but with the admonition and reminder to senator-judges that the request for admission shall have no evidentiary, factual, or prejudicial effect against the respondent,” aniya.

Binigyang-diin din ni Escudero na nananatili sa prosecution ang burden of proof at hindi ito maaaring ipasa kay Duterte sa pamamagitan lamang ng request for admission.