Balikbayan boxes, tiyaking hindi magagamit sa krimen

ni Ryan Sison @Boses | July 23, 2025

Ang balikbayan box ay simbolo ng pagmamahal, sakripisyo at tagumpay ng milyun-milyong overseas Filipino worker (OFW) para sa kanilang pamilya. Kaya’t ang paggamit nito bilang pantakip sa ilegal na droga ay hindi lamang krimen — ito’y pambabastos sa tiwala ng sambayanang Pilipino. Hindi dapat hayaan na ang mga kahon ng pag-asa ay gawing kasangkapan ng kasamaan. 

Ayon sa Bureau of Customs (BOC) mariin nilang kinokondena ang pag-abuso sa balikbayan privileges matapos masabat ang P749.63 milyong halaga ng hinihinalang shabu sa Manila International Container Port. 

Ayon kay Commissioner Ariel Nepomuceno, nakumpiska ang 110.24 kilo ng droga sa loob ng apat na kahon ng balikbayan boxes, kasunod ng isinagawang 100% inspection sa isang 40-foot container na unang idineklara bilang balikbayan box shipment. 

Sa tulong ng intel mula sa Customs Intelligence and Investigation Service, agad na inisyu ang Alert Order sa nasabing container. Isinailalim ang samples sa pagsusuri ng Philippine Drug Enforcement Agency (PDEA) na nakumpirmang methamphetamine hydrochloride nga ang laman nito. Ang naturang shipment ay itinurn-over sa PDEA bilang ebidensya para sa posibleng kasong paglabag sa RA 9165 (Comprehensive Dangerous Drugs Act) at RA 10863 (Customs Modernization and Tariff Act). 

Iginiit ni Nepomuceno na hindi nila palalampasin ang sinumang susubok samantalahin ang balikbayan privileges para sa ilegal na operasyon. Dagdag pa nito, mahalaga sa kanila ang pagtitiwala ng mga OFWs at dapat itong panatilihin sa pamamagitan ng mahigpit at patas na pagpapatupad ng batas. 

Sinabi pa ng kagawaran na ang operasyon ay tugma sa panawagan ng Pangulo na pagpapaigting ng border security upang maiwasan ang pagpasok ng ipinagbabawal na gamot sa ating bansa. 

Hindi ito simpleng pagkakasabat lang ng droga. Isa itong paalala na kahit ang mga bagay na puno ng pasalubong ay maaaring gamitin sa masamang gawain kung walang masusing pagbabantay. 

Ang gobyerno ay may tungkulin na tiyaking hindi magiging biktima ng kriminalidad ang integridad ng balikbayan system — isang institusyong matagal nang parte ng kultura ng mga Pilipino. 

Ang insidenteng ito ay babala sa lahat na walang sagrado sa mata ng mga sindikato, kahit ang balikbayan box ay puwede nilang gawing kasangkapan. Gayunman, dapat ay hindi mawala ang tiwala ng OFWs sa sistema ng gobyerno.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com