Bagong indoor record naitala ni vaulter Obiena

ni Gerard Arce - @Sports | March 7, 2022

Nagtala ng panibagong national indoor rekord si Tokyo Olympian pole vaulter Ernest John Obiena patungo sa isang silver medal finish sa World Athletics Indoor sa Perehe Elite Tour sa Rouen, France.

Kinumpleto ng 26-anyos na World No. 5 ranked ang kanyang talon na nagtapos sa 5.91-meters upang sirain ang sariling talang 5.86-meters na tinalon sa Orlen Copernicus Cup sa Torun, Poland noong nakaraang buwan.

Pumangalawa ang 2019 SEAG gold medalist kay World No.2 at Tokyo Olympics silver medalist Christopher Nilsen ng U.S. nang irehistro ang personal best na 6.05-meters. Kinapos lang ng 0.1 ang 24-anyos mula Kansas City, Missouri para matapatan ang inirehistrong American record na 6.06 ni two-time World champion at 2016 Rio Olympics bronze medalist Sam Kendricks sa USA Championships noong 2019.

Nagtapos sa third place si 2016 Rio Olympics champion Thiago Braz sa 5.91 dulot ng count back. Fourth place si World unranked American Jacob Wooten sa 5.81, kasunod si World No. 11 Valentin Lavillenie ng France sa 5.81 (count back). Magkakasunod mula 6th place hanggang 8th ang magkababayan na French na sina Ethan Cormot (5.71), Mathieu Collet (5.71), at Thibaut Collet (5.61). Lumapag sa 9th place si Menno Vloon ng The Netherlands sa 5.61-meters, World No.7 at 2012 London Olympics gold medalist Renauld Lavillenie ng France sa 5.51 at kababayang si Kevin Mayer sa 5.26-meters.