Bago naging host sa Eat… Bulaga! JOSE, IBINAGSAK SI TONI SA AUDITION NG BIRIT QUEEN

ni Mercy Lejarde @Showbiz Talkies | March 19, 2026

Photo: Jose Manalo at Toni Gonzaga - Toni Talks YT

Masayang kuwentuhan na may kasamang bukingan ang naging ganap sa YouTube (YT) channel ng singer-actress na si Toni Gonzaga na Toni Talks (TT) nang mag-guest sina Jose Manalo, Wally Bayola at Paolo Ballesteros.

Nagbahagi si Toni ng karanasan niya sa pag-audition sa Eat…Bulaga! (EB!) para sa segment na Birit Queen.

Kuwento ni Toni, “Si Jose ang naalala ko, nag-audition ako sa kanya sa Birit Queen.”

Tanong ni Wally kay Jose, “Ipinasa mo?”

Sagot ni Toni, “Hindi. ‘Di ko makakalimutan kasi nu’ng nag-host na s’ya, ‘Ito ‘yung ‘di pumasa sa akin. Ito ang ‘di nagpasa sa akin.’”

Tanong ni Jose, “Bakit ko ba ibinagsak ‘to?”

Natawa na lang si Jose sa kuwento ni Toni at pabirong sabi niya, “Pinabalik kita noon?”

Well, at least, hindi man naging parte ng Birit Queen si Toni ay naging host naman siya ng EB! ‘Di ba, Jose Manalo?

Tanong pa ni Toni, “Ano’ng pinaka-memorable ninyong Sugod-Bahay?”

Sagot ni Jose, “Nu’ng nalaglag ako sa kanal.”

Dagdag na tanong ni Toni, “Ba’t ka nalaglag sa kanal?”

Sagot ni Jose, “‘Di nakita sa camera, pero may naka-video, in-upload ‘yun. So nalaglag ako, ‘di nakita. Pag-ahon ko, sabi ni Tito Sen (Tito Sotto), ‘di n’ya raw nakita. ‘Oh, ‘di mo nakita?’ Inulit ko pa.

“Pero inisip ko na ‘di ako hihinga, ‘di ko ibubuka ‘yung bibig ko. Aahon agad ako kasi baka

may mainom ako.

“Tumawag din si sir. ‘Ano’ng nangyari? May mga open wounds ka ba?’ ‘Meron po.’ ‘Nasaan?’” pag-alala ni Jose sa naturang aksidente.

Pabirong sagot daw niya, “Ito po, ‘di ba, ‘yung nasa mukha ko?’

“Sabi n’ya, ‘‘Di ‘yan! Puro ka kalokohan! Nag-aalala kami sa ‘yo. Ano’ng gusto mo?’

“Sabi ko, ‘Sir, dagdagan n’yo po ‘yung sahod namin.’”

Hirit ni Toni, “Ang tibay ng resistensiya mo?”

Saad ni Jose, “Alam mo bang tulog ka na, pero napapanaginipan mo pa ‘yung amoy? Ganu’n s’ya. Ganu’n s’ya kalupit.”

Tungkol naman sa naging samahan nila bilang mga hosts, tanong pa ni Toni, “Nagkatampuhan ba kayo?”

Sagot ni Jose, “Sa totoo, wala. Walang salitang showbiz, wala.”

Well, in fairness sa JoWaPao (Jose Manalo, Wally Bayola, Paolo Ballesteros), marami na rin silang napasaya sa husay nila pagdating sa pagho-host.

Boom!