Ayuda sa mga estudyanteng hirap sa tuition

@Editorial | April 27, 2023

Hinikayat ng isang grupo ng mga lider ng mag-aaral ang Commission on Higher Education (CHED) na magpataw ng moratorium sa tuition at school fee hike para sa susunod na academic year sa mga pribadong paaralan.

Ito ay inaasahang makakadagdag sa pasanin ng pamilya sa gitna ng nararanasang taas-presyo sa mga bilihin at serbisyo.

Ang pagtaas umano ng matrikula ay maaaring higit na makapinsala sa mga estudyante na nahihirapan dahil karamihan sa kanila ay mula sa mga pamilyang may limitadong mapagkukunan ng pera.

Batid naman natin na hindi pa nakakabangon ang ating bansa mula sa krisis sa ekonomiya na dulot ng pandemya ng COVID-19 at nahaharap pa rin sa mataas at mabilis na inflation.

Kaya kung may pagkakataon o paraan ang gobyerno na matulungan ang mga estudyante na maitawid ang kanilang pag-aaral ay gawin na.

Marami sa mga mag-aaral ang matalino, matiyaga at gusto talagang makatapos, sadyang wala lang oportunidad na makapasok o makapagpatuloy dahil sa kawalan ng suportang pinansiyal.

Panawagan din sa malalaking kumpanya na ipagpatuloy at palawakin pa ang mga scholarship.

Kung magtutulungan ang gobyerno, pribadong sektor at mamamayan, mas aangat ang edukasyon na magiging pundasyon ng pag-unlad ng bayan.