Ayuda para sa mga Aeta na apektado ng habagat

by Jeff Tumbado @News | September 8, 2026

Photo: Nagbayanihan na ang mga residente at mga kawani ng iba't ibang ahensya ng Zambales Provincial Government at Botolan LGU sa paghahatid ng ayuda sa komunidad ng mga katutubong Aeta sa lugar. (Jeff Tumbado)

Hinatiran ng relief goods ang nasa 11 komunidad ng mga Aeta na apektado ng habagat sa liblib na silangang bahagi ng Botolan, Zambales nitong Linggo, Setyembre 6.

Ayon kay Gov. Hermogenes Ebdane Jr., nasa 2,519 pamilya mula sa 11 “Baytan” o silangang barangay ng Botolan ang nabigyan ng kabuuang 4,564 family food packs sa isinagawang magkasanib na relief operation ng provincial government at Botolan municipal government.

Isinakay sa Philippine Air Force (PAF) helicopters ang mga food packs para sa siyam na komunidad, habang ang ayuda para sa dalawang iba pang komunidad ng Aeta ay isinakay gamit ang mga karitong hinihila ng kalabaw.

Katuwang ng Provincial Disaster Risk Reduction and Management Office at Botolan Municipal Disaster Risk Reduction and Management Office sina Maj. Michael Vincent Perandos, acting deputy group commander ng Philippine Air Force at Lt. Col. Mark Anthony Ruelos, commander ng Philippine Army 69th Infantry Battalion sa Zambales sa naturang relief operations.