Away sa pera... Anak, kinatay ni tatay

ni Mai Ancheta @News | September 22, 2026

Photo: File

Patay ang isang 43-anyos na lalaki matapos saksakin ng kanyang ama matapos magkaroon ng pagtatalo sa Brgy. Mangoso, Sigma,Capiz.

Hindi na umabot nang buhay sa Mambuso District Hospital ang biktimang si alyas Tungkay dahil sa mga tinamong saksak sa katawan.

Batay sa report ng Sigma Municipal Police Station, lasing umanong umuwi ang biktima sa kanilang bahay at nagkaroon ng pagtatalo sa kanyang 76-anyos na  amang si alyas Apa.

Pera umano ang dahilan ng pagtatalo hanggang sa kumuha ng kutsilyo ang ama at pinagsasaksak ang lasing na anak.

Matapos makitang sugatan ang anak, mabilis na tumakas ang suspek.

Nagpapatuloy ang follow-up operations ng mga awtoridad upang madakip ang salarin.