Apektado ng ASEAN Summit... P10K ayuda sa jeepney driver

by Mervin Reyes @News | November 15, 2026

Photo: File / DSWD-IV-A

Nakatanggap din ng P10,000 cash assistance mula sa pamahalaan ang mga jeepney driver na naapektuhan ang biyahe dahil sa security measures para sa Association of Southeast Asian Nations (ASEAN) Summit sa Pasay City.

Ayon kay Department of Social Welfare and Development (DSWD) spokesperson Assistant Secretary Irene Dumlao, kabilang sa mga nabigyan ng ayuda ang halos 100 jeepney driver na bumibiyahe sa rutang Baclaran-Divisoria.

“Nasa 2,500 na ang nabigyan natin ng assistance. Ito 'yung mga eatery workers, vendors, sari-sari store owners, jeepney drivers na naapektuhan,” ani Dumlao sa isang panayam.

Humingi rin ng paumanhin ang DSWD sa mga naapektuhan ng security measures at paghahanda para sa summit. 

Samantala, inanunsyo ng transport group na PISTON ang isang araw na transport strike sa Nobyembre 16, kasabay ng pagbubukas ng ASEAN 2026 Summit. 

Layunin umano ng grupo na ipahayag ang pagtutol sa pagbisita ni US President Donald Trump, na sinisisi ng mga nagpoprotesta sa Maynila sa pagtaas ng presyo ng langis sa pandaigdigang merkado kaugnay ng digmaan ng US at Israel laban sa Iran.