P10 dagdag-presyo sa petrolyo... P12 fuel discount, stop dahil sa election ban

by Jeff Tumbado @News | September 20, 2026

Photo: File

Pansamantalang sinuspinde ng Land Transportation Franchising and Regulatory Board (LTFRB) ang P12 kada litro na fuel discount para sa mga public utility jeepney (PUJ) at UV Express simula Biyernes, Setyembre 18, dahil sa election ban para sa nalalapit na Barangay at Sangguniang Kabataan Elections (BSKE).

Sa isang advisory, sinabi ng LTFRB na mananatili ang suspensyon habang hinihintay ang kaukulang pag-apruba ng Commission on Elections (Comelec) para sa pagpapatuloy ng fuel discount program.

Nagsimula noong Biyernes, Setyembre 18, ang election ban para sa BSKE at nakatakda itong magtapos sa Nobyembre 1.

Sa ilalim ng election ban, ipinagbabawal ang pagpapalabas, paglalaan o paggastos ng pampublikong pondo para sa mga programang panlipunang kapakanan at serbisyong panlipunan, maliban sa mga programang pinahintulutan ng Comelec.

Ang pansamantalang pagkawala ng P12 kada litro na discount ay dumating sa panahong may inaasahang panibagong taas-presyo sa langis na posibleng umabot sa higit P10 kada litro.

Nauna nang itinaas ng pamahalaan sa P12 kada litro ang fuel discount para sa mga kwalipikadong PUV driver at operator.

Ayon sa pamahalaan, maaari itong magbigay ng hanggang P1,800 na matitipid kada linggo sa mga benepisyaryo.

Habang hinihintay ang desisyon ng Comelec sa fuel discount, patuloy namang pinag-aaralan ng pamahalaan ang iba pang hakbang upang maibsan ang epekto ng tumataas na presyo ng langis sa mga driver, commuter at iba pang sektor.

Hirit ng LTFRB na P20 para sa PUVs, tablado... P12/litro ayuda sa petrolyo sa jeep, UV Express — PBBM

ni Mylene Alfonso @News | August 6, 2026

Photo: File / LTFRB

Itataas sa P12 kada litro ang fuel discount para sa mga tsuper ng jeepney at UV Express simula Agosto 15, alinsunod sa direktiba ni Pangulong Ferdinand Marcos Jr. na palawakin ang ayuda sa sektor ng transportasyon.

Kapag naipatupad ang dagdag na diskwento, aabot sa P1,800 kada linggo ang matitipid ng bawat kwalipikadong driver.

Dalawang piso ang dagdag sa naunang P10 kada litrong diskwento na inilunsad noong Abril at nakinabang na ang mahigit 93,000 PUV drivers.

Napagkasunduan ang pagpapalawak ng fuel subsidy sa pulong na pinangunahan ni Executive Secretary Ralph G. Recto kasama ang mga miyembro ng Gabinete noong Agosto 4 sa Palasyo.

Tinalakay sa pagpupulong ang mga hakbang upang mapatatag ang ekonomiya, mapigilan ang pagtaas ng presyo ng mga bilihin, at matiyak ang tulong sa mga sektor na direktang naaapektuhan ng tensyon sa Gitnang Silangan.

Inatasan din ni Recto ang Department of Social Welfare and Development (DSWD) na tiyaking makarating ang UPLIFT assistance sa mga nangangailangang sektor, kabilang ang mga magsasaka, mangingisda, transport at construction workers, at iba pang manggagawang mababa ang kita.

Dumalo rin sa pulong sina Budget Secretary Kim de Leon, Public Works Secretary Vince Dizon, Social Welfare Secretary Rex Gatchalian, Transportation Secretary Giovanni Lopez, Education Secretary Sonny Angara, Health Secretary Jose Pujalte Jr., at Agriculture Undersecretary Roger Navarro. 

Matatandaang una nang sinabi ng Land Transportation Franchising and Regulatory Board (LTFRB) na nagsumite sila sa Malacañang ng rekomendasyon para sa P20 kada litrong fuel subsidy para sa lahat ng PUV sa loob ng isang buwan, na mangangailangan ng tinatayang P4.5 bilyong pondo.

Dagdag-ayuda sa PUV, pinag-aaralan na — LTFRB

ni Jeff Tumbado @News | July 26, 2026

Photo: File

Pinag-aaralan na ng Land Transportation Franchising and Regulatory Board (LTFRB) ang pagpapalawak at pagdaragdag ng fuel discount para sa mga pampublikong sasakyan (PUV) bilang tugon sa sunud-sunod na pagtaas ng presyo ng produktong petrolyo.

Inatasan ni Transportation Sec. Giovanni Lopez ang ahensya na talakayin ang naturang panukala, bukod pa sa patuloy na pagrepaso sa mga petisyon para sa dagdag-pasahe.

Ani LTFRB Chair Vigor Mendoza II, ang pagpapalawak at pagtaas ng fuel discount ang isa sa praktikal na hakbang habang nananatiling hindi tiyak ang sitwasyon sa Middle East.

Gayunman, inamin ni Mendoza na mangangailangan ng malaking pondo ang pagpapalawak at pagdaragdag ng fuel subsidy. Dagdag pa niya, tinitingnan lamang ang panukala bilang huling opsyon habang nagpapatuloy ang mga konsultasyon sa mga stakeholder sa iba't ibang panig ng bansa.