Ando at Diaz, kayang makabuhat ng ginto sa SEAG at Asian Games

ni Gerard Arce - @Sports | January 16, 2022

Kumpiyansa ang Samahang Weightlifting ng Pilipinas (SWP) na kayang bumuhat ng mga gintong medalya sa pangunguna ni first Olympic gold medalist Hidilyn Diaz sa 31st Southeast Asian Games sa Hanoi, Vietnam sa Mayo at 19th Asian Games sa Hangzhou, China sa Setyembre kahit na aminadong matindi ang kompetisyong kakaharapin.

Inihayag ni weightlifting president Monico Puentevella na bukod sa 30-anyos na Zamboangena native, nakikinita nitong sasandal din ang bansa kina Olympian Elreen Ando, 2019 SEA Games champion Kristel Macrohon at Asian Championship titlist Vanessa Sarno para makapagbubulsa ng hindi bababa sa tatlong gintong medalya sa Hanoi Meet na nakatakdang magbukas simula Mayo 12-23, habang magiging matindi naman ang labanan sa pagitan ng China, Kazakhstan, Turkmenistan, Uzbekistan at iba pang Asian powers sa Hangzhou Games simula Setyembre 12-25.

“We’re expecting to have at least 3 gold medals in the SEA Games, while in the Asian Games, we have to look for Hidilyn and fight for the remaining medals. Mabigat pa ring kalaban ang China eh, so we might be able to get at least two, though apat na sila ngayon na world class eh,” pahayag ni Puentevella noong Biyernes ng umaga.

Inamin ng 75-anyos na dating Philippine Sports Commission (PSC) commissioner na magkakaroon sila ng SEA Games qualifying at try-out sa Marso 8-13 sa Bacolod City. Subalit titignan pa kung maaaring makalahok sito ang 2019 biennial meet at 2018 Jakarta-Palembang Asian Games champion matapos tamaan ng COVID-19 kasama ang kanyang fiancée at head coach na si Julius Naranjo.

“Meron kaming try out qualifying sa SEA Games baka March 8-13, tignan lang kung pwede na si Hidilyn by that time, kase tinitignan ko kung maka-recover na siya,” wika niya. “And isa pa, we have to separate the weights of Sarno and Macrohon. Hindi pwedeng sila ang maglaban, kailangan hatiin natin, and need some adjustments.”