Ancajas patitibayin ng husto para sa nalalapit na laban

by Gerard Arce @Sports News | June 23, 2026

Photo: File

Sisiguraduhing mas iigting ang kondisyon at lakas ni dating longtime super-flyweight champion Jerwin “Pretty Boy” Ancajas sa pagbabalik upak kontra undefeated Mexican-American Omar Trinidad matapos sumailalim sa matinding pagsasanay ng batikang strength and conditioning coach Angel “Memo” Heredia.

Pinagtuunan ng husto ng kampo ni Ancajas ang mas lalo itong palakasin at patibayin sa pakikipaglaban matapos kakitaan ng panghihina sa ilang pagkatalo kontra dating kampeon Fernando Daniel “Puma” Martinez ng Argentina at kasalukuyang World Boxing Council (WBC) bantamweight titlist Takuma Inoue, kung saan natikman ng Pinoy southpaw ang kauna-unahang pagkatalo sa pamamagitan ng knockout.

Bukod sa regular na technical boxing sa ilalim ni head trainer at manager Joven Jimenez, sa kanilang main hub sa Knucklehead Boxing Gymnasium sa Las Vegas, Nevada sa Estados Unidos, patuloy ang pagpapalakas ng 34-anyos mula Panabo City, Davao del Norte kontra sa mas batang tubong Los Angeles, California. “Malaking tulong si Coach Memo. Okay ang condition ni Jerwin, todo ang training,” mensahe ni Jimenez sa Bulgar Sports para sa darating na laban ni Ancajas sa Hunyo 28 sa Chelsea Ballroom ng The Cosmopolitan sa Las Vegas, Nevada, USA. "Mga eight weeks niyang tinutukan si Jerwin." 

Isang dating Mexican discus thrower si Heredia na nagsimulang makilala sa larangan ng strength and conditioning at nakatrabaho ang mga kilalang boksingero na kinabibilangan nina Juan Manuel Marquez, Jorge Arce, Bambam Rios, David Benavidez, Yordenis Ugas at dating three-division world champion John Riel “Quadro Alas” Casimero.

Mayroong four-fight winning streak si Ancajas (38-4-2, 25KOs) na naghahangad na muling makabalik sa world title fight matapos pataubin si Mexican boxer Ruben Antonio Tostado Garcia sa fifth-round technical knockout noong Abril 18 sa Hipodromo Caliente, Arena Tecate, Tijuana, Baja, Mexico.