Anak ni Justice Secretary Remulla, inilipat na sa Las Piñas City Jail

ni Lolet Abania | November 9, 2022

Inilipat na ang panganay na anak ni Department of Justice (DOJ) Secretary Jesus Crispin “Boying” Remulla sa Las Piñas City Jail kaugnay sa drug charges nito, ayon sa isang opisyal ngayong Miyerkules.

Matatandaan na nahuli si Juanito Jose Remulla III matapos na makuhanan umano ng hinihinalang high-grade marijuana o kush na nagkakahalaga ng P1.3 million sa isinagawang controlled delivery ng inter-agency task force sa Las Piñas City noong Oktubre 11.

Kinumpirma ito ni Bureau of Jail Management and Penology (BJMP)-National Capital Region (NCR) spokesperson Sr. Insp. Hernand Macoy na si Jose Remulla ay nai-transfer na sa Las Piñas City Jail mula sa kostudiya ng Philippine Drug Enforcement Agency (PDEA) noong Nobyembre 4.

Kinasuhan si Remulla III ng paglabag sa Section 11 ng Comprehensive Dangerous Drugs Act of 2002.

Naghain naman ng not guilty plea ang batang Remulla sa ginanap na arraignment na isinagawa ng Las Piñas Regional Trial Court sa pamamagitan ng video conference noong Nobyembre 4.

Ngayong Miyerkules, ipinagpatuloy na ng Pasay City Prosecutor Office, sa ilalim ng isang special panel ng mga prosecutors, ang preliminary investigation hinggil sa drug case ni Remulla III.

Isa pang complaint para sa importation ng illegal drugs laban kay Remulla III ay nasa ilalim na ng preliminary investigation ng Pasay City Prosecutor’s Office.

Dahil sa pagkakaaresto sa batang Remulla, lumakas naman ang mga panawagan para sa resignation ni DOJ Secretary Remulla, pati na rin sa ilang mga mambabatas.

Subalit, iginiit ng kalihim na ang pag-aalis sa kanya sa posisyon aniya, “is not my call” at ang desisyon ay na kay Pangulong Ferdinand “Bongbong” Marcos, Jr.

Nanindigan naman ang matandang Remulla na hindi siya makikialam sa kaso ng kanyang 38-anyos na anak.

Batay sa rulings ng city at provincial prosecutors, maaari itong umapela sa Office of the Secretary of Justice para sa review. Ayon kay Secretary Remulla, hindi i-entertain ng ahensiya ang anumang appeal kaugnay sa kaso ng kanyang anak.

“If there is a resolution, don't let it reach the DOJ. Let it be discussed in court, whatever the case may be,” pahayag ng kalihim. “If it’s an adverse case against my son, it will not be appealed here. It will go straight to the courts for trial.”