Hindi natitinag ang Alas Girls sa FIVB U17 World C'ship

by Gerard Arce @Sports News | August 3, 2026

Photo: Ang koponan ng Alas Pilipinas U17 Girls—(mula kaliwa) Cristina Madele Gale, Irish May Mahinay, Resty Jane Olaguir, Jello Andrea Mauricio, Taj Arkhea Teves, Nadeth Faye Herbon, Jhenica Sadia (nakatakip), Caera Celis, Frances Dianne Ramos, Megan Yesha Hernandez, Sharina Rhyza Lleses, Jhaynna Love Bulandres, Xyz Ellen Rayco, Princess Khaira Manzano, assistant coach Oliver Balse at head coach Edwin Leyva. (POCpix)

Nakaalis na kahapon ang Alas Pilipinas Girls patungong Chile na determinadong harapin ang pinakamalaking hamon ng kanilang mga batang karera sa FIVB Volleyball Girls U17 World Championship.

Makikipagkompitensya ang youth squad ng Pilipinas laban sa ilan sa mga nangungunang koponan sa mundo sa torneo sa Agosto 6 hanggang 16, dala ang kumpiyansang nabuo mula sa kanilang pambihirang kuwalipikasyon sa Asian Volleyball Confederation Women's U16 Championship.

Sa kabila ng pagharap sa tradisyonal na kapangyarihan ng volleyball, iginiit ng Filipinas—suportado ng Philippine Olympic Committee, Philippine Sports Commission na hinaharap nila ang torneo nang walang takot.

"Pare-parehas lang po kami nagte-traning, so dapat huwag kaming matakot at ipakita lang namin kung ano pong meron sa team," ani UST standout Megan Hernandez.

Ang nangungunang scorer na si Xyz Rayco, na nagbida sa AVC U16 Championship ay sumasalamin sa mindset na iyon. "Kailangan ipakita namin na palaban kami," ani Rayco.

Naniniwala ang assistant coach na si Oliver Balse na makakatugma ang koponan sa mas matatangkad na kalaban sa pamamagitan ng kasanayan at paghahanda. "Sa age-group, kahit ibang lahi, pare-pareho pa. Merong taller players of course, but skills makakatapat tayo sa kanila," saad naman ni Balse. 

Naka-bracket ang Pilipinas sa Pool B kasama ang China, Mexico, Peru, Tunisia at Venezuela.

Kasama rin sa koponan sina Khaira Manzano, Irish May Mahinay, Frances Dianne Ramos at Jhaynna Bulandres ng NU, Madele Gale ng Bacolod Tay Tung, Sharina Lleses ng King's Montessori School, Caera Celis ng St. John's Institute, Resty Jane Olaguir at Jhenica Sadia ng Ateneo, Taj Arkhea Teves ng UST, Nadeth Herbon ng Leyte National HS  at Jello Andrea Mauricio ng San Felipe Neri Catholic School.

Nangunguna ang host Chile sa Pool A na kinabibilangan ng Czechia, Egypt, Thailand, Turkiye at US. Ang Pool C ay ang Argentina, Brazil, Croatia, Spain, Japan at Poland. Ang Italy at Korea ay nasa Pool D kasama ang Algeria, Dominican Republic, Puerto Rico at Chinese Taipei.