800 Pinoy na na-deport mula Malaysia, balik-'Pinas na

by Mai Ancheta @News | November 2, 2026

Photo: 800 Pinoy na ipinadeport mula Malaysia ay nakabalik na sa Pilipinas - DSWD IX

Nasa 800 Pilipino na ilegal na nagtatrabaho at nanirahan sa Sabah, Malaysia ang na-deport at nakabalik sa bansa sa pamamagitan ng barko na dumaong sa pantalan sa Zamboanga City.

Dumating ang mga na-deport na Pinoy sakay ng MV Antonia 1 mula sa Sandakan, Sabah at nakarating sa Zamboanga City nitong  Biyernes ng gabi.

Karamihan sa mga na-deport ay nagmula sa detention centers sa Sandakan, Papar at Tawau, sa Sabah.

Kabilang sa mga na-deport ay 589 na mga kalalakihan, 89 na kababaihan at 128 na mga batang lalaki at babae na 12-anyos pababa.

Ito ang ikalawang batch ng Filipino deportees na dumating sa bansa, una noong January 2026.

Ang mga deportee ay tinutulungan na ng DSWD IX para makabalik sa kani-kanilang mga pamilya.