8-anyos, pinaghahampas sa ulo ng kaklase, patay

ni Mai Ancheta @News | July 24, 2026

Photo: Circulated / FB

Patay ang 8-anyos na babaeng estudyante sa elementarya matapos umanong paghahampasin sa ulo ng lalaking kaklase sa loob ng kanilang paaralan sa Davao City.

Batay sa pulisya, naganap ang insidente noong Biyernes nang pinaghahampas ng notebook sa ulo ang biktimang si alyas Mae. 

Pag-uwi sa bahay, idinaing umano ng biktima ang pananakit ng ulo at kinabukasan, Sabado, nakaramdam umano ito ng matinding sakit ng ulo kaya isinugod sa pagamutan.

Lumitaw sa CT scan ng biktima na mayroong pagdurugo sa kanyang bungo at pumutok na ugat, at sa kabila ng pagsisikap na maisalba ang buhay, tuluyan itong nasawi.

Nagpapatuloy ang imbestigasyon para matukoy kung ano ang magiging disposisyon sa suspek na isang menor-de-edad.