64 OFWs mula Israel, darating na

ni Eli San Miguel - Trainee @News | November 6, 2023

Inaasahan ang pagdating ng 64 overseas Filipino workers mula sa Israel ngayong linggo bilang bahagi ng government repatriation dahil sa kasalukuyang alitan sa Middle East.

Ayon kay Department of Migrant Workers officer-in-charge Undersecretary Hans Leo Cacdac, inaasahan ang pagdating ng unang grupo ng OFWs ngayong hapon, na binubuo ng 22 OFWs at isang bata.

Ikalimang grupo na ng OFWs ang darating sa pamamagitan ng Etihad Airways flight EY 424 sa Terminal 3 ng Ninoy Aquino International Airport (NAIA-3).

Sa mga OFWs na darating, 19 ang mga caregivers habang mga trabahador sa hotel ang natitirang tatlo.

Bukas naman, Nobyembre 7, inaasahan ang pagdating ng karagdagang 42 OFWs na magiging ikaanim na grupo ng mga Pinoy na napauwi mula nang magsimula ang alitan noong Oktubre 7.