600 general at colonel sa PNP, nag-resign — Azurin

ni Lolet Abania | January 9, 2023

Halos nasa 600 ranking police officers ang nakapaghain ng kanilang courtesy resignations sa ngayon bilang tugon sa apela ni Department of the Interior and Local Government (DILG) Secretary Benhur Abalos, ayon sa Philippine National Police (PNP).

“As of yesterday, we were able to account more or less 500 to close to 600, as reported ng mga different regions, different units namin,” saad ni PNP chief Police General Rodolfo Azurin Jr. sa isang press briefing ngayong Lunes.

“Bale, ‘yung iba dito is en route na papunta dito sa national headquarters because sila ang magko-collate lahat and then ipapasa ‘yan doon sa five-man committee that will be formed by no less than our commander-in-chief,” sabi ni Azurin.

Noong nakaraang linggo, umapela si Abalos sa mga police generals at full colonels na magsumite ng courtesy resignation bilang bahagi ng pagsisikap ng gobyerno na maalis sa hanay ng police force of officers ang mga nasasangkot sa illegal drug trade.

Ayon kay Azurin, umaasa pa rin ang PNP na makatatanggap ng tinatayang 456 resignations. Aniya, inaasahan nila ang kabuuang 956 officials na maghain ng kanilang courtesy resignations.

Nang tanungin kung isasama pa siya sa imbestigasyon matapos ang kanyang retirement sa Abril ngayong taon, ani Azurin, “Definitely.”

“Definitely, hangga’t hindi ako na-clear,” pahayag ni Azurin.

Samantala, isang five-member committee ang bubuuin para i-screen ang mga resignation ng mga police officers at kabilang dito si Baguio City Mayor Benjamin Magalong na isang retired police general.

“As to the other members, I am not yet privy or I do not have any idea kung natawagan na sila at in-accept na sila,” sabi ni Azurin.

Anang opisyal, nag-demand naman ang PNP ng pagkakaroon ng pagkakapantay-pantay at professionalism mula sa panel.

“Because, gaya nga ng sinabi natin, we are talking here of the career of senior officers ng PNP who worked very hard in the last 30 years or more of their service,” wika pa ni Azurin.