6 tirador ng kable, timbog

by Jeff Tumbado @News | November 16, 2026

Photo: Circulated

Arestado ang anim na indibidwal matapos umanong mahuling nagnanakaw ng mga telecommunications cable sa Sikatuna Street, Barangay Zapatera, Cebu City, madaling-araw ng Linggo, Nobyembre 15.

Kinilala ng pulisya ang mga suspek na alyas na Eric, 35, dating technician ng isang telecommunications company; Janriel, 39; Daven, 32; Ronan, 42; Edwin, 51; na pawang residente ng Barangay Basak, San Nicolas; at Jesie, 30, residente ng Barangay Calamba.

Batay sa ulat, nagsasagawa ng regular na pagpapatrolya ang mga tauhan ng Barangay Public Safety Office (BPSO) ng Zapatera nang mapansin ang mga suspek na naghuhukay at humihila ng mga underground cable pasado alas-5 ng madaling-araw, dahilan upang agad nilang ipagbigay-alam ang insidente sa mga awtoridad.

Agad namang rumesponde ang mga pulis at naabutan ang grupo habang kinukuha ang mga kable nang walang kaukulang pahintulot o dokumento, kaya't agad silang inaresto.

Nahaharap ang mga suspek sa kasong pagnanakaw (theft), habang patuloy ang imbestigasyon ng pulisya sa insidente.