6 tips na dapat gawin kung nahuli ang partner na may kasamang iba

ni Nympha Miano-Ang - @Life and Style | February 21, 2021

Hala! bigla mong nasalubong si dyowa, may kasabay o kaya pagpasok mo sa resto, nakita mong may kasalo siyang kumakain.

1) Teka lang, huwag kang sisigaw at huwag mage-eskandalo. Ang pinakamainam na dapat gawin ay simpleng manahimik muna sa mga nakita.

2) Ang pakikipaghamunan sa kanya o sa kasama niya ay dapat munang kontrolin sa isip at sa mga gagawin. Huwag ka munang iimik at hayaan mo munang makapagpalamig kayong dalawa. Hayaan n’yo munang dumaan ang ilang araw bago pa man gumawa ng anumang hakbang, ito’y upang kapwa kayo makapag-isip-isip at mahinahon ang lahat sa oras ng pag-uusap.

3) Sikapin na sa gagawing pag-uusap ay malaman ang kanyang tunay na damdamin. Talaga bang balak ka na niyang ipagpalit o inlab na siya sa iba. Sikapin pa ring malaman mula sa kanya sa mahinahon na paraan ang mga bagay na ito. Kung ikaw pa rin naman ang kanyang mahal, pakinggan ang kanyang mga paliwanag, puwedeng kalimutan ang nangyari at magpatawad ka.

4.Kung sasabihin mo na ikaw ay magpapatawad, dapat mo itong ipakita at patunayan at tiyakin na handa ang partner sa gagawing pagpapasya. At kung hindi ang relasyon ay puwedeng humantong sa kawalan ng tiwala, pagrerebelde,hindi na pagkakausap o namumuhi na sa bawat isa.

5) Sikaping maintindihan kung bakit nagtaksil si labs. Analisahin o isiping mabuti kung ano ba ang mali sa iyong ugali maging ang takbo ng relasyon ninyong dalawa kung bakit humantong sa ganoon ang lahat at kung bakit nakikipagmabutihan na siya sa iba.

6) Iwasan ang pagkakalat ng tsismis o anumang personal na impormasyon hinggil kay labs oras na mag-break na. Magandang mangyari na maghiwalay na walang aberya at walang samaan ng loob. Iwasang maging bitter sa relasyon at palipasin na nangyari sa lahat. Huwag mo nang ipagkalat pa ang kasalanan ninuman sa inyo.