ni Lolet Abania | October 29, 2020
Niyanig ng 4.5-magnitude na lindol ang lalawigan ng Batangas ngayong hapon, ayon sa Philippine Institute of Volcanology and Seismology (Phivolcs).
Sa ulat ng Phivolcs, naramdaman ang paggalaw ng lupa bandang ala-1:25 ng hapon ngayong Huwebes at tectonic in origin. Naitala ang epicenter ng lindol sa layong 13.75°N, 120.87°E - 008 km N 88° W bayan ng Mabini, Batangas at may lalim na 02 kilometro.
Ayon sa Phivolcs, Intensity IV ang nai-record na pagyanig sa Mabini, San Luis, Lemery, Rosario, Agoncillo, Calatagan, Balayan, Bauan, Sta. Teresita sa Batangas; sa Tagaytay City; at sa Alfonso at Amadeo sa Cavite.
Naramdaman naman ang Intensity III sa Batangas City; Malvar, Talisay, Tanauan, Alitagtag Batangas; at San Pablo at Laguna; at Intensity II sa Quezon City; Mandaluyong City; Navotas City; Majayjay, Laguna; Dolores, Quezon.
Gayundin, Intensity I ang naitalang lindol sa Malabon City; Pasay City; Talisay, Batangas; Sta. Cruz, Laguna.
Naglabas din ang Phivolcs ng ulat ng Instrumental Intensities sa mga sumusunod na lugar:
Intensity IV- Calatagan, Batangas; Tagaytay City
Intensity II- Muntinlupa City; Dolores, Quezon
Intensity I- Quezon City; Carmona and Bacoor City, Cavite; Mauban, Quezon; Talisay, Batangas
Wala namang naiulat na nasirang ari-arian matapos ang lindol. Pinapayuhan ang lahat na maging mapagmatyag at mag-ingat sa inaasahang aftershocks, ayon pa sa Phivolcs.