3-YO Sprint Race ilalarga sa SLLP

ni Green Lantern - @Renda at Latigo | August 20, 2022

Sunud-sunod ang mga stakes races na inilalarga tuwing Linggo ngayong buwan ng Agosto.

Sa huling Linggo ng buwan na ito ay ikakasa ang 2022 PHILRACOM "3-Year-Old Sprint Race" na gaganapin sa San Lazaro Leisure Park sa Carmona, Cavite.

Nauna ng nagdeklara ng pagsali sina Eazacky at Gomezian sa distansiyang 1,000 meter race.

Rerendahan ni jockey John Alvin Guce si Eazacky habang si class A rider Oneal Cortez ang gagabay kay Gomezian sa karerang nakalaan ang guaranteed prize na P1-M na ikakalat sa unang apat na kabayong tatawid sa meta.

Ayon sa komento ng mga karerista, mga dekalidad na kabayo ang mga kasali kaya paniguradong mapapalaban sina Eazacky at Gomezian sa event na inisponsoran ng Philippine Raacing Commission, (PHILRACOM) sa pamumuno ni chairman Reli De Leon.

Makakatagisan ng bilis nina Eazacky at Gomezian ay sina Club Kensai, Enigma Uno, Palauig at Roaring Kanyon. Hahamigin ng mananalong kabayo ang P900,000 habang ibubulsa ng second, third at fourth placers ang tig-P337,500, P187,500 at P75,000 ayon sa pagkakahilera.

Mag-uuwi rin ng P75,000 ang breeder ng winning horse, tig-P45,000 at 30,000 ang second at third.

Samantala, bukas naman ikakasa ang 2-Year-Old Maiden Stakes Race na gaganapin sa Metro Turf, Malvar - Tanauan City, Batangas.

Matitikas din ang mga kalahok na sina Cole Is A Roll, Sonic Clay, Alalum Falls, Bandido, Buena Bella, Galactus, Istulen Ola, Orange Bell, Stealing Heaven, Sylvia Plath at Wind Master.