3 pari, itinalaga sa ‘public affairs’ post ni Cardinal Advincula

ni Lolet Abania | January 25, 2022

Itinalaga ni Manila Archbishop Jose Cardinal Advincula ang tatlong pari na mamumuno sa mga ministeryo na nakatuon sa “public affairs” ng archdiocese, batay sa post sa website ng Catholic Bishops’ Conference of the Philippines (CBCP).

In-appoint ni Cardinal Advincula si Fr. Reginald Malicdem, na nagsisilbing rector ng Manila Cathedral ng anim na taon, bilang spokesperson ng archdiocese.

Sa isang circular na inisyu nitong Enero 20, na isinapubliko nito lamang Lunes, itinalaga rin ng archbishop si Nuestra Señora de Perpetuo Socorro Parish, Fr. Jerome Secillano bilang head ng Ministry on Public Affairs.

Si Fr. Secillano, na siya ring executive secretary ng Committee on Public Affairs CBCP, ay papalitan si Fr. Atilano Fajardo.

Ayon din kay Cardinal Advincula, papalitan naman ni Fr. Enrico Martin Adoviso si Msgr. Hernando Coronel, bilang head ng Ministry on Socio-Political Advocacy, ang kinatawan na nangangasiwa sa Parish Pastoral Council for Responsible Voting (PPCRV).