2nd medal ni Obiena, bronze sa Athletissima

ni Gerard Arce - @Sports | August 27, 2022

Nagbulsa ng ikalawang sunod na medalya sa international event ngayong second season si 2020+1 Tokyo Olympian at World Championships third placer Ernest John Obiena ng bronze medal sa men’s pole vault sa 2022 Athletissima sa Lausanne, Switzerland, na parte ng Wanda Diamond League.

Tulad ng dati, muli na namang pinagharian ni World No.1 at Summer Olympic gold medalist Armand Duplantis ng Sweden sa bagong meet record na 6.10-meters ang naturang paligsahan na sinegundahan ni Olympic at 2022 World runner-up Christopher Nilsen ng U.S. na tumapos sa 5.80 meters.

Tumapos din sa parehong 5.80-meters ang Filipino 2-time Southeast Asian Games champion, na hindi lang pinalad sa countback, na gaya ng 2022 World Athletics Championships, sila-sila rin ang nagkita sa podium finish.

Naging maganda ang panimula ng Asian record holder para sa pitong pangunahing kompetisyon sa ikalawang parte ng season matapos maiuwi ang gintong medalya sa 26th Internationales Stablocjsprung-Meeting sa Jockgrim, Germany ng talunin ang 5.81 meters nitong nagdaang araw.

Nagtapos sa 4th place si Sondre Guttormsen ng Norway sa 5.80m, na sinundan nina Ben Broeders ng Germany sa 5.70 (5th), French pole vaulters Thibaut Collet sa 5.60 (6th), Anthony Ammirati sa 5.60m (7th), at magkapatid na Renaud at Valentin Lavillenie sa parehong 5.40 at Dominik Alberto ng Switzerland sa 5.40 (10th).

Nakatakda ring lahukan ng Asian Athletics titlist sunod True Athletics Classics sa Lunes, St. Wendel City Jump sa Huwebes, Memorial van Damme sa Set. 2, ISTAF Berlin sa Set. 4 at Golden Fly Liechtenstein sa Set. 11.