29 arestado sa cryptocurrency investment scam

ni Ejeerah Miralles (OJT) | March 12, 2023

EGYPT — Arestado ang 29 suspek, kabilang ang 13 foreign nationals, sa cryptocurrency investment scam noong Sabado.

Nasabat ng pulisya ang 95 phones, 3,367 SIM cards at halaga ng $194,000 Egyptian at Foreign currency.

Ayon sa awtoridad, itinatag ng mga suspek ang Hoggpool, isang cryptocurrency mining app, na naglalayon sa mga potensyal na investor na kumita ng $1 kada araw, maaari rin umanong mamuhunan hanggang $800 sa crypto-mining "machine" at mag-pay-out ng $55 kada araw. Nagkaroon din umano ng feature na maaaring kumita ng 5 beses sa halaga na paunang na-invest sa loob ng 5 araw.

Nang hindi ma-withdraw ang pera sa mining app, agad na naglabas ng hinaing sa internet ang mga biktima.

Batay sa imbestigasyon, hindi bababa sa £19 milyon o $615,000 ang nakamkam ng mga suspek sa mga biktima.

Samantala, hindi pa tukoy ang tunay na bilang ng mga biktima.