Mga health workers na buwis-buhay sa laban sa COVID-19, wala pa ring natatanggap na ayuda?!

Galit na galit si Pangulong Rodrigo Duterte nang malamang hindi pa nakakatanggap ng ayuda ang mga health workers na nagkasakit o namatay dahil sa laban sa COVID-19.

Nakakagulat at nakapagtataka na matapos ang tatlong buwan ng Bayanihan To Heal As One Act ay hindi pa rin naibibigay ang inilaang P100-K para sa mga nagkasakit na frontliner at P1 milyon naman sa mga namatay. Ano’ng nangyari?

Kaya binigyan na ng ultimatum ang mga ahensiya at opisyal na responsable sa isyu — ibigay na ang compensation benefits sa mga health workers.

Nakakahiya sa ating mga frontliners na buwis-buhay araw-araw at may pagkakataong nalalagay na rin sa panganib ang kani-kanilang pamilya.

Masasabing hindi matutumbasan ng anumang halaga ng pera ang paglilingkod ng ating mga frontliners sa gitna ng pandemya.

Gayunman, gumawa pa rin tayo ng paraan para maiparamdam sa kanila ang ating pagsaludo at taus-pusong pagpapasalamat.