Wala nang pag-asa sa presyo ng langis

by Info @Editorial | September 14, 2026

Hindi na bago ang balita: tataas na naman ang presyo ng produktong petrolyo. Pero hindi ibig sabihin na dapat masanay na lamang ang publiko sa paulit-ulit na dagok sa bulsa.

Sa bawat malaking oil price hike, hindi lang motorista ang tinatamaan. Kasunod nito ang mas mataas na gastos sa pamamasada, paghahatid ng produkto, operasyon ng negosyo at kalaunan, presyo ng pagkain at iba pang pangunahing bilihin.

Ang problema, habang mabilis ang pagtaas ng gastusin, hindi ganoon kabilis ang pag-angat ng kita ng ordinaryong manggagawa. Ang pamilyang dati nang nagtitipid ay mapipilitang magbawas pa. Ang driver na kumakayod buong araw ay mas maliit ang maiuuwi. Ang maliit na negosyante ay kailangang mamili kung sasagutin ang dagdag na gastos o ipapasa ito sa mamimili.

Hindi kontrolado ng Pilipinas ang presyo ng langis sa pandaigdigang merkado. Ngunit hindi sapat na dahilan iyon para maging hanggang paliwanag na lamang ang tugon ng pamahalaan.

Kapag bigtime ang taas-presyo, dapat bigtime din ang hakbang upang protektahan ang publiko. Kailangang bantayan ang profiteering, tiyaking tama ang presyo sa mga gasolinahan, palakasin ang ayuda sa pinakatinatamaang sektor at maglatag ng pangmatagalang paraan upang mabawasan ang sobrang pagdepende ng bansa sa imported na langis.

Sa dulo, hindi lang litro ng gasolina ang pinag-uusapan dito.

Ang kabuhayan ng Pilipino ay nauubos sa bawat dagdag na piso.

Mga pulitiko todo-bangayan, taumbayan, gutom!

by Info @Editorial | September 13, 2026

Habang nagpapalitan ng banat, paratang at hamon ang mga pulitiko, natatabunan ang mas mabigat na laban ng bayan. 

Hindi bangayan ang laman ng sikmura ng pamilyang kapos sa pagkain.

Patuloy ang kahirapan, mabigat ang presyo ng mga pangunahing bilihin, at marami ang naghahanap ng disenteng kabuhayan. Kasabay nito, nananatiling seryosong usapin ang krimen at seguridad sa mga komunidad.

Pero ano ang madalas na nangingibabaw? Mga sagutan, intriga at tunggaliang pampulitika. Mas maraming enerhiya ang nauubos sa pag-atake sa kalaban kaysa sa paghahanap ng solusyon sa problema ng mamamayan.

May lugar ang kritisismo at pananagutan sa isang demokrasya. Ngunit kapag personal na ambisyon at pulitika ang inuuna habang naghihirap at nangangamba ang publiko, mali na ang prayoridad.

Tama na ang ingay. Magtrabaho, magbigay ng resulta at unahin ang bayan—dahil habang nag-aagawan ang mga pulitiko sa kapangyarihan, ang ordinaryong Pilipino ang naiiwan sa kahirapan at takot.

Mabigat na parusa sa gumagamit ng fake PWD ID

by Info @Editorial | Nov. 16, 2024

Ang paggamit ng pekeng PWD card ay isang malinaw na uri ng panlilinlang at pagsasamantala sa mga benepisyong itinakda ng batas para sa mga tunay na may kapansanan. 

Ito ay hindi lamang isang simpleng paglabag sa batas, kundi isang tahasang pagnanakaw mula sa mga taong tunay na nangangailangan ng tulong. 

Ilang restaurant owners ang nagpahayag ng pagkabahala dahil sa mga kostumer na gumagamit umano ng pekeng PWD cards. May pagkakataon daw na sa sampung nagda-dine in, anim ang PWD card holders at minsan kuwestiyunable pa dahil kung pagmamasdan ay physically able naman ang iba.

Bukod sa dumarami ang mga negosyong nawawalan ng kita, maaaring maapektuhan din maging ang mga manggagawa. Kapag nalugi ang negosyo, walang trabaho.

Para masugpo ang problemang ito, kailangan ng mas mahigpit na pagpapatupad ng mga regulasyon at mga mekanismo upang matiyak na ang mga PWD cards ay napupunta lamang sa mga karapat-dapat. 

Ang mga may hawak ng pekeng card ay dapat managot sa ilalim ng batas upang magsilbing babala sa iba pang mga posibleng gumawa ng parehong paglabag. 

Higit sa lahat, kinakailangan ang masusing edukasyon at awareness campaign upang ipaalam sa publiko ang kahalagahan ng pagiging tapat at ang mga epekto ng maling paggamit ng mga benepisyo para sa PWD.