2 lalaki, kulong sa baril

ni Maeng Santos @News | September 13, 2026

Photo: Circulated. Caloocan City

Kalaboso ang dalawang lalaki nang madampot ng pulisya dahil sa pagdadala ng baril sa Caloocan City.

Sa ulat ng tanggapan ni NPD Director P/BGen. Benliner Capili, nagpapatrulya ang mga tauhan ni Caloocan Police Chief P/Col. Joey Goforth sa Bo. San Lazaro, Brgy. 187 nang maaktuhan nila ang 24-anyos na si alyas Win-Win na pinaglalaruan ang hawak na baril alas-2:15 ng madaling-araw.

Gayunman, nang mapansin ng suspek ang presensya ng kapulisan ay kumaripas ito ng takbo, subalit hinabol siya ng mga ito hanggang sa makorner, saka kinumpiska ang dala nitong isang kalibre .38 revolver na karagado ng tatlong bala.

Nauna rito, inaresto naman ng mga tauhan ng Sangandaan Police Sub-Station na nagsasagawa ng operation ang 24-anyos sa Brgy. 12 nang matiyempuhang may bitbit umanong baril habang pagala-gala sa nasabing lugar at nakuha sa kanya ang isang kalibre .38 revolver na kargado ng dalawang bala.

Nang hanapan sila ng kaukulang mga dokumentong nagpapahintulot sa kanila na magmay-ari at magdala ng baril ay kapwa walang naipakita ang mga suspek.