2 helicopter, nagsalpukan habang nag-aapula ng wildfire

ni Justine Berganio @Overseas News | August 4, 2026

Photo: Circulated / SS

Nagbanggaan ang dalawang firefighting helicopter habang nagsasagawa ng aerial operation laban sa malaking wildfire sa Attica region, Greece nitong Linggo.

Ayon sa Greek Fire Service, ligtas na nasagip ang crew ng isang helicopter, habang nagpapatuloy ang search and rescue operation para sa mga sakay ng ikalawang aircraft na nasangkot sa insidente.

Dahil sa lumalalang wildfire, nagpatupad ang mga awtoridad ng sapilitang evacuation sa ilang komunidad sa Attica, kabilang ang mga lugar malapit sa bayan ng Megara, upang mailayo sa panganib ang mga residente.

Samantala, panibagong wildfire din ang sumiklab sa tourist island ng Kefalonia, dahilan upang lumikas ang mga residente sa ilang komunidad habang patuloy ang pag-apula sa apoy.

Bagama’t humuhupa na ang mga wildfire sa France at Spain, nananatiling mataas ang banta ng sunog sa iba’t ibang bahagi ng Europa dahil sa matinding tagtuyot at heatwave, na nagpapalala rin sa kakulangan ng suplay ng tubig.