2,063,007 printed ePhilIDs ng registrants, nakuha na – PSA

ni Lolet Abania | November 22, 2022

Nakapag-isyu na ang Philippine Statistics Authority (PSA) ng mahigit sa 2 milyong printed ePhilIDs, ang digital version ng Philippine Identification (PhilID).

Ayon sa PSA, umabot sa 2,063,007 printed ePhilIDs ang na-claim ng mga registrants sa PhilSys registration centers sa buong bansa hanggang noong Nobyembre 11, 2022.

Naglagay naman ang PSA ng 1,535 registration centers na mayroong 3,926 registration kits para makapag-isyu ng printed ePhilIDs sa mga registrants.

“The printed ePhilID is a proactive strategy of the PSA to allow registered persons to immediately utilize the benefits of PhilSys, such as faster and seamless transactions in accessing financial and social protection services requiring proof of identity, subject to authentication. It is designed to have the same functionality and validity as the physical card,” pahayag ng ahensiya.

Nagpasalamat naman si National Statistician at PSA Civil Registrar General Undersecretary Dennis S. Mapa sa publiko sa mainit na suporta para sa printed ePhilID.

“We would like to underscore that every registered person will receive their physical card even if they have already claimed their printed ePhilID,” dagdag ni Mapa.

Tulad ng physical card, ang pagkuha ng isang printed ePhilID ay libre rin at walang bayad. Sinabi rin ng PSA na ang 2 milyong printed ePhilIDs na kanilang inisyu ay tinatanggap din sa mga transaksyon.

Ayon pa sa PSA, “The printed ePhilID will be honored in transactions as a valid and sufficient proof of identity and age, subject to authentication, in all national government agencies, local government units (LGUs), government-owned and controlled corporations (GOCCs), government financial institutions (GFIs), financial institutions, and the private sector.”

Maaari namang ma-access ng mga registrants ang ePhilID Appointment System sa https://appt.philsys.gov.ph upang malaman kung puwede na nilang i-claim ang kanilang printed ePhilID.