ni Lolet Abania | December 1, 2022
Mas marami pang oportunidad na trabaho ang naghihintay sa mga Pilipino abroad kasabay ng pag-anunsiyo ng Canada na nangangailangan sila ng 1,000 nurses para sa isa nilang mga lalawigan.
Batay sa ulat ng GMA News, ipinahayag ni Saskatchewan Health Minister Paul Merriman na ang matatanggap na aplikante ay may initial salary na tinatayang P150,000.
Habang magiging eligible rin sila para sa iba pang mga benepisyo na nae-enjoy ng mga Canadian employees.
“It’s lifestyle choices and those choices that they can have to be able to have that work-life balance which is very good in Saskatchewan,” pahayag ni Merriman.
“We want to provide them with an option and an opportunity. With all that they’re being sought-after by other countries,” dagdag ni Merriman.
Aniya, 21 porsiyento ng mga bagong immigrants sa Canada ay mga Pilipino. At para lalong mahikayat ang mga nurse na mag-apply, sinabi rin ni Merriman na ang maha-hire na mga empleyado ay may option na dalhin nila ang kanilang pamilya sa Canada.
“We don’t just recruit the worker, we recruit the family and there’s an instant integration into our education system. We offer them healthcare immediately,” saad ni Merriman.
“If the spouse is looking for employment, we’ll try to find the spouse employment,” sabi pa niya.
Sa ngayon, ang Saskatchewan Health Ministry ay nakikipag-ugnayan na sa Department of Migrant Workers (DMW) para sa signing ng isang memorandum of understanding (MOU) para sa nasabing job opportunity.
Nagbabala naman ang DMW sa publiko laban sa mga illegal recruiters na nagkalat sa social media sites.