16M SIM cards, naka-register na – DICT

ni Lolet Abania | January 9, 2023

Umabot na sa 16,150,926 SIM cards ang nai-register ng mga telecommunications companies hanggang Enero 9, batay sa inilabas na datos mula sa Department of Information and Technology (DICT) ngayong Lunes.

Ang SIM Registration Act ay may mandato para sa registration ng lahat ng aktibong SIMs at bagong nakuhang mobile numbers sa bansa, na layong masugpo ang mga tinatawag na SMS-linked scams.

Ayon sa DICT, base na rin sa data mula sa National Telecommunications Commission (NTC), hanggang Enero 9, ang kabuuang registered SIM ay nasa 9.56 porsiyento na mula sa kabuuang 170 milyong SIMs sa bansa.

Sinabi pa ng DICT na ang Smart Communications Inc. ay nakapag-report ng kabuuang 7,584,321 registered SIMs, habang ang Globe ay may 7,137,764 SIMs at ang DITO Telecommunity na may 1,428,841 SIM cards sa ngayon.

Ang mga SIM users ay mayroong 180 araw para mairehistro ang kanilang mga SIMs.

Hinimok naman ng DICT ang publiko na magpa-register na ng kanilang SIMs bago pa dumating ang deadline nito.

“We encourage all SIM subscribers who have not yet registered their SIMs to register already with their PTEs to ensure that their SIMs won’t be deactivated,” pahayag ni DICT Spokesperson Anna Mae Lamentillo.

“We also remind everyone to register only through the official platforms provided by the PTEs,” sabi pa ni Lamentillo.