16-anyos at tropa, sinita, pulis binanatan sa mukha

ni Jeff Tumbado @News | August 19, 2026

Photo: BCPO-S5 / Circulated

Sugatan sa ilalim ng mata ang isang 43-anyos na pulis matapos suntukin sa mukha ng 16-anyos na Grade 11 student sa labas ng isang paaralan sa Brgy. Granada, Bacolod City, nitong Linggo.

Batay sa imbestigasyon, nangyari ang insidente matapos sawayin ng pulis na may ranggong Police Master Sergeant, ang grupo ng mga kabataang naglalaro ng skateboard sa gitna ng kalsada.

Kasunod nito ay bigla na lamang lumapit sa kanya ang menor-de-edad na suspek at sinuntok siya sa mukha.

Nahinto lamang ang pananakit ng binatilyo dahil sa ilang mga residente sa lugar ang nakakita at umawat sa suspek.

Nagtamo ng malaking sugat sa ilalim ng mata ang pulis.

Nasa kustodiya na ng CSWDO ang menor-de-edad na suspek matapos itong isuko ng ina.