14 M SIM cards, naka-register na – NTC

ni Lolet Abania | January 6, 2023

Mahigit sa 14 milyon subscriber identity modules (SIMs) na ang nakapag-register sa kani-kanilang service providers nitong Enero 4, 2023, matapos na simulan ang proseso ng SIM registration noong huling linggo ng Disyembre ng nakaraang taon, ayon sa National Telecommunications Commission (NTC).

Batay sa SIM registration update na naka-post sa NTC’s website, may kabuuang 14,050,125 SIM ang naka-register na sa bansa.

Sa press briefing ngayong Biyernes, sinabi ni NTC officer-in-charge Ella Blanca Lopez na ang bilang ng registered SIM ay kumakatawan sa 8.31% ng tinatayang 170 million SIM cards sa buong bansa.

Sa kabuuang bilang, ang Smart Communications Inc. ang nakapag-record ng pinakamataas na bilang na may 6,713,632 SIMs registered, kasunod ang Globe Telecom Inc. na may 6,135,596 SIMs registered at DITO Telecommunity Corp., na nakapag-register ng 1,200,897 SIMs.

“As far as the NTC is concerned, we are satisfied at how the telcos are handling the SIM registration as well as the enhancements on the system after the first few days of the registration,” saad ni Lopez.

Kinilala naman ni Lopez ang naging commitment ng telcos para sa pagpapabuti at pagpapaganda ng proseso ng kanilang SIM registration upang mas mapagaan ang paggamit ng mga mobile subscribers.

Ang SIM registration ay alinsunod sa Republic Act (RA) 11934 o ang Subscriber Identity Module (SIM) Registration Act, na layong i-regulate ang issuance at paggamit ng mga SIMs, kung saan ito ay mahalaga para sa pag-operate ng mga mobile devices gaya ng mobile phones at pocket Wi-Fis.

Inaasahan naman sa naturang batas na masusugpo ang pagkalat ng mga spam texts at scams gamit ang mga mobile devices.

Ayon sa NTC, ang registration ng SIM ay maaaring gawin online sa pamamagitan ng mga websites o applications na inilatag ng mga telecommunications companies.