12 ranking official ng PNP, ‘di pa nag-resign – spox

ni Lolet Abania | January 19, 2023

Mayroon na lamang 12 ranking officials ng Philippine National Police (PNP) na hindi pa nakapaghain ng kanilang courtesy resignations, ayon kay PNP spokesperson Police Colonel Jean Fajardo ngayong Huwebes.

“Yes, 12 pa po [12 pang opisyal na hindi nagsumite ng courtesy resignations],” ani sa isang mensahe sa GMA News ni Fajardo.

Nang tanungin si Fajardo hinggil sa dahilan ng mga naturang opisyal, aniya, “[they are] due for retirement.”

Nitong Miyerkules, nasa 941 ng 953 o 98.74% ng mga general at full colonels ng PNP ang nakapagsumite na ng kani-kanilang courtesy resignations, ayon kay Fajardo.

Una nang nanawagan si Department of the Interior and Local Government (DILG) Secretary Benhur Abalos sa mga naturang opisyal na maghain ng courtesy resignations upang maalis sa hanay ng mga police officers ang umano’y sangkot sa ilegal na droga.

Aniya, isang 5-man committee, kabilang si Baguio City Mayor Benjamin Magalong, ang nakatakdang mag-screen ng mga resignations.

Sinabi rin ni Abalos na ang National Police Commission (NPC) ang magre-review sa mga police officers na ang mga resignations ay tatanggapin.

Ayon naman kay PNP chief Police General Rodolfo Azurin Jr., hiniling ng PNP na ang mga committee members ay maging anila, “objective, fair and circumspect [in their undertakings during the screening]”.

“We are expecting that they will maintain their impeccable character and integrity so that the result of all their evaluation will be acceptable to everyone,” pahayag ni Azurin.

“Similarly, we appeal that the process will be devoid of personal and political biases,” dagdag ni Azurin.