11 kabataang Pinoy, sasali sa ASEAN-Japan exchange program

ni Eli San Miguel - Trainee @News | November 7, 2023

Napili ang 11 kabataang lider mula sa Pilipinas para lumahok sa 10-day international cultural exchange program sa Tokyo, Japan.

Makikilahok ang mga kabataang Pinoy sa 47th Ship for Southeast Asian and Japanese Youth Program (SSEAYP) — isang exchange program kung saan pinili ng Japanese government ang mga kalahok at sinusuportahan ng 10 kasaping bansa ng ASEAN.

Gaganapin ang programa sa Nobyembre 29 hanggang Disyembre 8, 2023.

Pinamumunuan ni Jogepons Ruloma ang grupo, isang public servant, registered environmental planner, at licensed professional teacher mula sa Bohol.

Kasama ni Ruloma ang iba pang mga kabataang lider, sa pangalang: Verna Abby Catusalem (Aurora), Aldrine Anzures (Manila), Brian Delos Santos (Masbate), Justine Angelica Orbe (Bataan), Leyden Sta. Isabel (Bacolod), Kingsley De Los Santos (Iloilo), Wilfred Paller (Aklan), Raymark Estael (Agusan del Sur), Abdulfarid Guinomla (Cotabato), at Hilton Soberano (Davao).

Sa pamamagitan ng National Youth Commission, ipapadala ang mga kabataan sa Japan upang makalahok sa mga immersion program, cultural presentations, field studies, collaborative discussions kasama ang mga international counterparts, courtesy visits, at para dumalo sa pagdiriwang ng anibersaryo para gunitain ang 50th Year of ASEAN-Japan Friendship and Cooperation.