11-anyos binaril sa mukha at leeg, dedo

ni Justine Berganio @Overseas News | September 26, 2026

Photo: SS / ABC

Patay ang isang 11-anyos na batang lalaki matapos barilin sa loob ng isang unit sa Norwest, Northwest Sydney, Australia nitong Lunes.

Ayon sa pulisya, natagpuan ang bata na may tama ng bala sa mukha at leeg at agad na isinugod sa Westmead Children’s Hospital. Matapos manatiling kritikal, binawian siya ng buhay alas-8 ng gabi nitong Huwebes.

May limang iba pang tao na nasa bahay nang mangyari ang insidente na hindi nasaktan. 

Tatlong 18-anyos na lalaki naman ang naaresto, kabilang si Isaac Bechara na kinasuhan

ng pagtatago umano ng isang serious indictable offence. Hindi siya nag-apply ng piyansa.

Ayon sa pulisya, kilala na nila ang unit at ilan sa mga taong naroon dahil dati na silang nakaugnayan. Sinisilip din ng mga imbestigador ang posibleng koneksyon sa organized crime, bagama’t wala pa umanong direktang ugnayan sa kasalukuyang mga conflict.

Patuloy ang imbestigasyon habang nagluluksa ang pamilya at mga kaibigan ng batang kabilang sa Sydney Maronite community.