106K nars, kailangan ng ‘Pinas – DOH

ni Lolet Abania | September 29, 2022

Umabot na sa 106,000 nars ang kailangan ng Pilipinas sa parehong public at private facilities, at mga ospital, ayon sa Department of Health (DOH).

Sinabi ni DOH Officer-in-Charge Maria Rosario Vergeire na may kakulangan na rin sa mga doktor, pharmacists, radiologic technologists, medical technologists, occupational therapists, physical therapists, midwives, at dentista.

“We have a shortage or a gap of around 106,000 para mapunuan natin ‘yung mga facilities natin all over the country, both public and private,” saad ni Vergeire kaugnay sa pangangailangan ng mga nurses sa bansa.

“Sa ngayon, meron tayong mga plantilla positions that are still to be filled up sa ating mga ospital,” dagdag ng kalihim sa isang press conference ngayong Huwebes.

“Nananawagan po tayo sa ating mga kababayan na our nurses here in the country, midwives in the country, our dentists, and other healthcare professionals, meron tayong vacant na plantilla positions para ma-hire namin kayo,” diin pa ni Vergeire.

Hinimok din ng opisyal ang mga ito na makipag-ugnayan sa Human Resources Bureau ng DOH para ang kanilang mga dokumento ay agad na maproseso.

Nagpahayag naman si Vergeire ng pagkabahala hinggil sa migration ng mga healthcare workers sa ibang mga bansa.

Aniya, nais ng DOH na ma-maintain ang 7,500 yearly deployment cap.

“Isa po ito sa mga dahilan kung bakit nagkukulang ang mga healthcare workers dito sa ating bansa, specifically doon sa ating mga facilities. This is because of the migration of our healthcare workers,” paliwanag ni Vergeire.

“Hanggang sa kulang pa po ang produksyon ng ating bansa sa mga specific healthcare worker professions na ito, sana ‘yung deployment cap natin ay manatili na lang sa gano’n,” giit pa niya.