100% lakas ni Pacman titiyakin kontra Barrios

ni Gerard Arce @Sports News | June 30, 2025

Photo: Pacquiao vs Barrios - PBC / Prime

Asinta ng nag-iisang eight-division world champion Manny “Pacman” Pacquiao na siyento-por-siyento s’yang sasagupa kontra kay World Boxing Council (WBC) welterweight champion Mario “El Azteca” Barrios para sa 12-round main event title fight sa Hulyo 19 sa MGM Grand Garden Arena sa Las Vegas, Nevada sa Amerika.

Hindi nagpapa-awat sa pagsasanay at pagpapalakas ang 46-anyos na Filipino boxing legend upang malampasan at mapagtagumpayan ang 30-anyos na Mexican-American na tangan rin ang matangkad na height at angking reach advantage. Hindi kuntento ang bagong upong International Boxing Hall of Famer na magkaroon ng madaling ensayo at training camp, lalo pa’t hangad nitong maagaw ang korona kay Barrios upang maiselyong muli ang panibagong rekord sa kasaysayan bilang ‘oldest 147-pound boxer’ sa buong mundo.  

“I’m happy with these first 30 days I’ve been in L.A. We’ve reached the level we wanted to accomplish. Right now – [through] this weekend and next – we’re in heavy training. Then, we’ll wind down,” pahayag ni Pacquiao sa panayam ng Boxingscene. “Most fighters come back at like 50-60 percent condition, just to come back. I don’t want that. I want 100 percent.”

Walang patid sa paghahanda sapol ng dumating sa Los Angeles, California si Pacquiao, na agad na nagtungo ang Pinoy southpaw sa pamosong Wild Card Boxing Gymnasium para muling makasama ang boxing hall of fame trainer na si Freddie Roach, gayundin ang ibang miyembro ng ‘Team Pacquiao’ na sina Marvin Somodio, Australian Strength and Conditioning coach Justin Fortune at malapit na kaibigang si Buboy Fernandez upang simulan ang intensibong pagsasanay.