Year-end bonus at cash gift, dagdag sa P30K ng taga-gobyerno

ni Mylene Alfonso @News | November 8, 2026

Photo: File

Makatatanggap ng year-end bonus na katumbas ng isang buwang basic salary at karagdagang P5,000 cash gift ang mga kwalipikadong empleyado ng gobyerno kasabay ng kanilang unang sahod ngayong Nobyembre, ayon sa Department of Budget and Management (DBM).

Inihayag ng DBM na nailabas na ang P82.998 bilyong pondo sa mga ahensya ng pamahalaan para sa nasabing benepisyo ng mga kwalipikadong sibilyan at militar na tauhan.

Iniutos ni Budget Secretary Kim Robert de Leon sa mga ahensya na tiyaking sabay na maibibigay ang year-end bonus at cash gift sa unang payroll ng Nobyembre, sa halip na ipagpaliban o ilabas sa hiwalay na payroll.

Bukod ito sa nauna nang inanunsyong one-time incentive na hanggang P30,000 na maaaring matanggap ng mga kwalipikadong kawani ng gobyerno sa Disyembre.

Gayunman, nakadepende ang nasabing insentibo sa pagtugon ng kani-kanilang ahensya sa mga itinakdang pamantayan ng DBM sa performance at pagtitipid sa gastusin.