Weightlifter diaz at 10 pa, hahakot ng medalya sa WWC

ni Gerard Arce - @Sports | September 21, 2021

Pipiliting makabitbit ng medalya ang matibay na 11-man roster ng Samahang Weightlifting ng Pilipinas Inc (SWPI) sa 2021 Weightlifting World Championship sa Disyembre 7-17 sa Tashkent, Uzbekistan sa pangunguna ni 2020 Tokyo Olympics women’s gold medalist Hidilyn Diaz.

Inaasahan ni SWPI president Monico Puentevella na kahit paano ay makapag-uuwi ng medalya ang mga Filipino weightlifters kasunod ng momentum na dala-dala ng nagdaang Summer Olympic Games, kung saan nakamit ng bansa ang kauna-unahang gintong medalya sa Olympiad mula sa 30-anyos na Zamboanguena native sa women’s under-55kgs category, gayundin ang pagkamit ng Olympic record.

“Susubukan natin na makapag-uwi ng medalya. Kahit paano may kaunti tayong pag-asa dahil andiyan naman si Hidilyn, tapos malaking exposure ito para sa iba nating mga weightlifters in preparation for 2024 Paris Olympics,” wika ni Puentevella sa panayam ng Bulgar Sports sa telepono.

Makakasama ng 2018 Jakarta-Palembang Asian Games at 2019 SEAG champion sa World Championships sina weightlifting teenage sensation at Asian Youth at Asian Championships gold medalist Vanessa Sarno (women’s 71kgs) ng Bohol, Tokyo Olympian Elreen Ando (women’s 59kgs), SEAG titlist Kristel Macrohon, Mary Flor Diaz (women’s 45kgs), Elien Rose Perez (women’s 49kgs), Margaret Colonia (women’s 64kgs), John Fabuar Ceniza (men’s 61kgs), Dave Lloyd Pacaldo (men’s 67kgs) at John Dexter Tabique (men’s 96kgs).

“Hopefully nmay medalyang makuha ang ating mga weightlifters basta ang importante eh magawa nilang makalaban at makakuha ng qualification for Paris,” saad pa ng 75-anyos na tubong Bacolod City.

Nakatakdang magtungo muli sa Malaysia si Diaz kasama si coach Julius Naranjo para doon gawin ang kanyang pagsasanay at paghahanda para sa World Championship. Matatandaang sa naturang bansa rin ito nagsanay para sa Tokyo Games ng mahigit isang taon kasama ang TeamHD nina coach Naranjo, coach Kaiwen Gao, nutritionist Jeaneth Aro at sports psychologist Karen Trinidad.