‘Wag na sanang ituloy ni P-BBM ang PhilHealth contribution hike, kasi dagdag-pahirap ‘yan sa taumbayan

ni Pablo Hernandez @Prangkahan | Enero 19, 2024

SI P-BBM KAYA ANG NAG-UUDYOK KAY SPEAKER ROMUALDEZ NA KUMANDIDATONG PRESIDENTE SA 2028 ELECTION? -- Duda ni presidential sister, Sen. Imee Marcos na may nag-uudyok daw sa pinsan niyang si Speaker Martin Romualdez na kumandidatong presidente sa 2028 presidential election.

Dahil malapit si Speaker Romualdez sa pinsan niyang presidente, kaya’t ang tanong: Hindi kaya si P-BBM ang tinutukoy ni Sen. Imee na nag-uudyok kay Speaker Romualdez na kumandidatong presidente sa 2028 presidential election? Boom!

◘◘◘

SINU-SINO KAYA ANG MALALAKAS NA KANDIDATONG SENADOR NG PARTIDO NI P-BBM? -- Sinabi ni presidential son, Ilocos Norte Rep. Sandro Marcos na malakas na line-up daw ang ipanlalaban ng partido nilang Partido Federal ng Pilipinas (PFP) sa senatorial election sa 2025.

Sinu-sino kaya ‘yang mga malalakas na kandidato for senator sa 2025 election na partido ni P-BBM? Abangan!

◘◘◘

SA SURVEY ANG DAMI PA RING NAGHIHIRAP, KAYA PATUNAY NA FAKE NEWS ANG SINABI NG UNITEAM NOON NA AAHON SA KAHIRAPAN ANG PINOY KAPAG SI BBM NAGING PRESIDENTE -- Sa latest survey ng SWS ay halos kalahati ng populasyon ng mga Pilipino ang nagsabing sila ay mahirap.

Patunay ‘yan na fake news ang ibinibida ng UniTeam noon na kapag si BBM naging presidente, aahon na sa kahirapan ang sambayanang Pinoy, period!

◘◘◘

PHILHEALTH CONTRIBUTION HIKE, PAHIRAP SA MAMAMAYAN KAYA DAPAT SUSPENDIHIN ITO NI P-BBM -- Pag-aaralan daw ni Pres. Bongbong Marcos (P-BBM) ang mungkahi ni Health Sec. Ted Herbosa na suspendihin o huwag nang ituloy ang plano ng Marcos administration na magtaas ng kontribusyon sa PhilHealth ang mga member nito.

Sa totoo lang, hindi na dapat pang pag-isipan ‘yan ni P-BBM, dapat huwag na itong ituloy kasi sa taas ng presyo ng mga bilihin at bayarin sa bansa ay dagdag-pahirap sa mamamayan ang PhilHealth contribution hike, period!