Utos ni P-Du30, nationwide na — Palasyo... ‘Di bakunadong ayaw manatili sa bahay, arestuhin

ni Lolet Abania | January 7, 2022

Ipinag-utos na ni Pangulong Rodrigo Duterte na arestuhin ang mga indibidwal na hindi bakunado laban sa COVID-19 na tumangging manatili sa kanilang tirahan sa gitna ng pandemya kung saan ipapatupad sa buong bansa, ayon sa Malacañang ngayong Biyernes.

“Dahil nakikita po natin sa datos na iyong mga unvaccinated po, kapag nahawa po ng COVID ay napupunta sa malubhang kalagayan, nagiging severe at critical. So nationwide po iyan,” paliwanag ni acting presidential spokesperson Karlo Nograles sa isang Palace briefing, hinggil sa stay-at-home order ng Pangulo nitong Huwebes ng gabi na ibinaba sa mga barangay officials kung saan “restrain and arrest” ang mga unvacccinated individuals na tatangging manatili sa kanilang tahanan.

Sa kanyang Talk to the People, iginiit ni Pangulong Duterte ang kanyang awtoridad bilang Punong Ehekutibo sa gitna ng national emergency para ipag-utos ang mobility restriction sa mga hindi bakunadong indibidwal.

“In the absence of a law, the President is called upon to act and because it is a national emergency, it is my position that we can restrain,” pahayag ni Pangulong Duterte.

Ayon sa Pangulo, ang mga barangay chairpersons ay maaaring ipatupad ang lahat ng mga batas sa bansa na gawin aniya, “within his community.”

“I am now giving orders to the barangay captains to look for those persons who are not vaccinated and just request them or order them if you may to stay put,” sabi ng Pangulo.

Samantala, umabot na sa 51 milyong Pilipino ang fully vaccinated kontra-COVID-19 sa ngayon, kung saan hindi nakamit ng gobyerno ang target nitong 2021 yearend na 54 milyong indibidwal na maging fully vaccinated laban sa coronavirus.

Target ng administrasyong Duterte na makapag-fully vaccinate ng 77 milyong Pilipino hanggang Marso ngayong taon habang 90 milyon naman hanggang Hunyo.

“The only way out of this pandemic is vaccination,” sabi naman ni Nograles.

“We have enough doses. Let us get vaccinated and the booster shot as soon as possible,” dagdag pa ng kalihim.