ni Pablo Hernandez III @Prangkahan | December 23, 2022
MAYOR LACUNA, MAYOR SOTTO, MAYOR TEODORO, MAYOR ABALOS AT MAYOR ZAMORA, WA’ EPEK KONTRA MANRARAKET—Hindi lang pala si Manila City Mayor Honey Lacuna, ang hindi nasama sa Top 5 mahuhusay na alkalde sa Metro Manila, base sa survey ng RP-Mission and Development Foundation Inc., hindi rin nasama sa Top 5 sina Pasig City Mayor Vico Sotto, Marikina City Mayor Marcy Teodoro, Mandaluyong City Mayor Benjamin Abalos at San Juan City Mayor Francis Zamora.
Sa totoo lang, hindi talaga sila makakasama dahil sa Maynila ay wa’ epek si Mayora Lacuna na ipa-stop ang raket na bookies at lotteng nina “Boy Abang” at “Lorna” at dedma rin sina Mayor Sotto, Mayor Teodoro, Mayor Abalos at Mayor Zamora, na banggain ang raket na STL (Small-Town Lottery)-con jueteng nina “Kit” at “Egay” sa kanilang nasasakupan.
◘◘◘
SELF-EMPLOYED DOBLE-ARAY NEXT YEAR SA INFLATION RATE AT DAGDAG-BUTAW SA SSS—Sa dagdag-butaw na pinaiiral ng Social Security System (SSS) next year, ang mga kababayang tatamaan ay self-employed.
Base sa anunsyo ni SSS Pres. Michael Regino, ang 13% butaw sa SSS ay magiging 14% at hindi dapat “umaray” ang mga manggagawa dahil ang kanilang amo ang magbabayad nito, pero ang masaklap, dahil wala namang amo ang mga self-employed na SSS member, doble-aray ang kanilang aabutin.
◘◘◘
UNIVERSAL HEALTH CARE DAGDAG-PAHIRAP SA MAMAMAYAN—Ang dahilan ni PhilHealth Senior Manager Rey Balena, na kaya mula sa dating 4% ay magiging 4.5% ang butaw ng mga miyembro sa PhilHealth ay dahil base sa nakasaad sa Universal Health Care (UHC) Law na nilagdaan ni Duterte ay puwedeng magtaas ng butaw sa PhilHealth ang mga miyembro nito.
Tsk! Hindi talaga maganda ang epekto ng UHC na ‘yan sa mamamayan.
◘◘◘
PALPAK ANG WAR ON DRUGS NI DIGONG—Ayon kay Sen. Ronald dela Rosa, epektibo ang Oplan Tokhang laban sa droga noon, kaya nga lang ay maraming namatay sa drug war.
Hindi epektib ang drug war ni Duterte dahil talamak pa rin ang kalakaran ng droga sa bansa.