Tips sa pagtitipid na paraan pagkatanggap ng suweldo

ni Nympha Miano-Ang - @Life and Style | December 15, 2020

Araw na naman ng suweldo ngayon, besh! May laman na naman ang ATM account mo. Nakaltas na roon ang lahat ng kontribusyon sa GSIS, SSS, Philhealth etc o kung may retirement payment pa.

Simulan mo nang itabi ang 10% ng iyong kinikita sa savings account. Maglaan ka na ng P3,000 na iipunin. Ngayon ay may natitira kang halimbawa na P9,000. Pinakamahalagang dapat mong babayaran ay ang upa, bayarin sa tubig at kuryente, gastos sa groceries at iba pang utang.

Pinakamainam na magbayad kada suweldo sa renta, kala-kalahati kahit buwanan ang bayaran. At magbayad na rin ng bills kahit wala pang due date.

Kung due na ang renta next week, ibayad na agad ang P1,500 kung P3,000 ang upa mo. May matitira ka pang P7,500. O kaya ay itabi na ang P3,000 na pambayad renta. Mamimili ka ng pagkain kinabukasan at madalas kang gumastos ng P3,000 sa isang linggo, may natitira kang P4,000.

Halimbawa, magpapagasolina ka ng motorsiklo na ginagamit mo ng isang linggong pang-full tank, may halagang P300. May natitira ka pang P3,700 para sa susunod na dalawang linggo.

May babayaran ka sa daycare na P2,000 kada buwan. Pero hindi ka naman nag-aalala dahil si mister ang magbabayad sa susunod na payday. Oras na makasanayan mo nang ma-budget ang tamang pagbabayad ay mainam na iyan. Kung magkakaltas ka ng P500 para ibayad muna sa daycare, may matitira ka pang P3,200.

Ang iba pang bills ay next 2 weeks pa magkaka-due. Kaya gawin na ang half payment method at itabi na ito para maireserba sa darating na bills. Ang kuryente, gas, tubig, internet kapag pinagsama ay may halagang P3,200. Kaya ang kalahati niyan ay P1,600 at iyan ang matitira sa'yo.

Iyang P1,600 ay puwede mo na magamit para sa charity, pagpapagupit, pagbili ng damit o kung ano ang kailangan mong bilhin pa.

Habang nakaplano kung saan mo gagamitin ang iyong kinitang pera tuwing kinsenas. Mas malalaman mo kung paano ang tamang pag-budget. Kung first time mo itong gagawin, pero hindi pa rin umubra, mag-adjust na lang ulit. Magagawa mo pa ring maka-survive hanggang next payday. Tiis lang.

Lahat naman tayo ay kumikita para ibayad sa mga pangangailangan buwan-buwan. Kung kumikita ka naman para sa sarili lamang, tiyakin na weekly ay nakakaipon ka.

Kaya kung may plano tayo sa perang pinaghihirapan sa halip na dalasan ang paggastos sa mamahaling pag-order ng mga pagkain sa mga fancy restaurant at paglalakwatsa sa tuwing sumusuweldo, kalaunan naman ay magagawa mo na ito nang madalas kapag nakumpleto mo na ang iyong mga obligasyon.