Taas-tuition, huwag namang isabay sa dagdag-presyo ng bilihin

ni Ryan Sison @Boses | April 30, 2023

Habang patuloy na tumataas ang inflation rate sa Pilipinas, isang grupo ng mga estudyante ang nananawagan sa Commission on Higher Education (CHED) na magpataw ng moratorium sa pagtaas ng tuition fee at iba pang bayarin para sa susunod na academic year.

Sa isang press conference kasama ang iba pang mga student leaders mula sa mga unibersidad sa Metro Manila, sinabi ng isang kinatawan ng National Union of Students of the Philippines na dapat magpatupad ng freeze ang mga paaralan sa pagtaas ng tuition fee upang mabigyan ng pahinga ang kanilang mga pamilya mula sa kasalukuyang krisis sa ekonomiya.

Ayon sa mga analyst, bumaba ang inflation sa 7.6% noong Marso mula sa 8.6% noong Pebrero, habang ang First Metro Investment Corp. at University of Asia at ang Pacific Capital Markets Research ay inaasahang nasa 6.3% ang inflation ngayong taon.

Nag-greenlight ang CHED sa pinakahuling round ng tuition at iba pang pagtaas ng bayarin noong 2021. Mahigit 50 private tertiary education ang nagtaas ng kanilang tuition fee ng 4.74%.

Ayon sa datos ng CHED, ang pinakamataas na average tuition fee increase mula noong 2017 ay nangyari noong academic year 2020-2021 sa panahon ng COVID-19 pandemic, na tumaas ng 12.06% sa buong bansa.

Ayon sa CHED Memorandum No. 3 noong 2012, sa pagtukoy kung makatwiran ba ang pagtaas ng tuition fee at iba pang bayarin sa mga paaralan, isinasaalang-alang ng CHED ang mga factors gaya ng inflation rate, financial standing of school, students’ financial capacity at track record ng paaralan.

Ang inflation ay isa sa mga dahilan ng pagtaas ng presyo sa sektor ng edukasyon. Ang mahahalagang pangangailangan ng mga estudyante tulad ng uniporme, textbooks, tuition fees, sapatos, at pamasahe ay naging napakamahal at unti-unting nagiging imposible para sa isang karaniwang mamamayan na matustusan ang pag-aaral ng kanilang mga anak.

Kung sakaling matuloy ang pagbaba ng tuition fee, tiyak na maraming estudyante at magulang ang matutuwa, lalo na ang mga nagbabalak na magkolehiyo.

Karamihan kasi sa mga estudyanteng gustong magkolehiyo ay kapos sa pinansyal kaya napipilitan silang huminto na lamang sa pag-aaral.

Pakinggan sana ang hinaing ng mga estudyante dahil masakit sa bulsa para sa kanilang magulang ang pagtaas ng mga matrikula, lalo na ngayong napakataas na ng presyo ng mga bilihin.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com