ni Eli San Miguel - Trainee @News | November 17, 2023
Arestado ang isang suspek sa robbery-extortion sa isinagawang entrapment operation sa Makati ng National Bureau of Investigation (NBI) ngayong Biyernes.
Ayon sa pahayag ng NBI, umupa ng Sedan ang complainant mula Marso 25 hanggang Abril 3, 2023, at ibinigay ito sa suspek matapos magsumite ng mga ID at signed form.
Ipinabatid din ng complainant sa suspek ang pinsala mula sa isang minor accident habang nasa kanyang pangangalaga ang sasakyan, at parehong nagkasundo ang mga partido para sa P35,000 kompensasyon mula sa biktima para sa pinsala.
Bagaman nagbigay na ang biktima ng kabuuang P43,000 mula nang maganap ang aksidente, iniulat na nagbanta pa ang suspek na ipakukulong siya nito.
Humingi pa umano ang suspek ng P300,000 na may kasamang pagbabanta na kapag hindi nabayaran ay magsasampa ng kaso at ilalantad ang mukha ng biktima sa social media.
Haharap ang suspek sa mga kasong robbery at extortion kaugnay ng RA 10175, Estafa, at Grave Threats.