Super Swerte, nakabawi kay Boss Emong sa Naic

ni Green Lantern - @Renda at Latigo | March 22, 2022

Bumilib kay Super Swerte ang kanyang mga tagahanga matapos manaig sa 2022 Philracom Classic Cup na ginanap sa Santa Ana Park sa Naic, Cavite noong Linggo ng hapon.

Pag-aari ni Sandy Javier, nakabawi si Super Swerte kay Boss Emong na nakipag-tagisan ng bilis mula largahan hanggang sa meta para makuha ang inaasam na panalo.

Ginabayan ni dating Philippine Sportswriters Association, (PSA) Jockey of the Year awardee Jessie B. Guce, na umuna agad sa arangkadahan si Super Swerte pero agad siyang kinapitan ni Boss Emong, pambato ni horse owner Edward Diokno.

Kahit naagaw ng bahagya ni Boss Emong ang unahan ay hindi nasira ang loob ni Super Swerte.

Pagsapit ng rektahan ay nakitaan ng husay si Super Swerte, nabawi ang unahan at saka tumawid sa meta. "The excitement that horseracing gives the public is unparalleled as evidenced by the cheers that went on. On that, I thank the bayang karerista for their unending support and rest assured that more exciting races are in store in the near future,"saad ni Philippine Racing Commission (PHILRACOM) chairman Reli De Leon.

Inirehistro ni Super Swerte ang 1:53 minuto sa 1,800 meter race sapat upang hamigin ang premyong P1.5M habang napunta sa second placer na si Boss Emong ang P500,000.

Tumersero si War Cannon habang pang-apat si Isla Puting Bato na sumikwat ng tig-P250,000 at P125,000 ayon sa pagkakasunod.

Nakaraan lang ay tinalo ni Boss Emong si Super Swerte nang maglaban sila sa Commissioner's Cup. Samantala, nagwagi si Fantastic Matty sa PHILRACOM Rating Based Handicapping System na pinakawalan sa pangatlong karera.